Os monicreques danzantes chamados BAVASTEIS, dos que existían diversas variantes, non era estraño atopalos ao longo do percorrido do Camiño de Santiago, onde trovadores, xograres, músicos ambulentes e cegos acompañándose de gran variedade de instrumentos e nalgúns casos deste tipo de monicreques, pedían esmola para poder así completar a súa ruta.

Esta clase de marionetas entraron na Península Ibérica no século XII, polo intercambio cultural entre os xograres franceses e os da península, como se acredita nas cantigas de Santa María de Afonso X o Sabio e os cancioneiros galaicoportugueses, sendo durante séculos, xunto coas marionetas de guante ou cachiporra, unha das máis utilizadas. Pero na segunda metade do século XIX, a arte dos músicos ambulantes facendo bailar os seus monicreques foi desaparecendo.

Por iso nós decidimos ir co noso carromato musical rendendo unha homenaxe a todos estes músicos ambulantes, os cales nos inspiraron para crear o que hoxe son Os Monifates e o noso espectáculo, para así poder seguir un pouco máis con esta tradición secular que forma parte do noso patrimonio cultural inmaterial.